Act 8 | Ndebele | STEP | Njalo uSawuli wayevumelana lokubulawa kwakhe . Ngalolosuku kwasekusuka ukuzingelwa okukhulu kwebandla elaliseJerusalema; bonke basebehlakazeka emazweni eJudiya leSamariya , ngaphandle kwabaphostoli.

1 Njalo uSawuli ^a wayevumelana lokubulawa kwakhe ^b. Ngalolosuku kwasekusuka ukuzingelwa okukhulu kwebandla elaliseJerusalema; bonke basebehlakazeka emazweni eJudiya ^c leSamariya ^d, ngaphandle kwabaphostoli. 2 Amadoda akholwayo ^e asembutha uStefane ^f, amenzela isililo esikhulu ^g. 3 Kodwa uSawuli walichitha ibandla, engena izindlu ngezindlu ^h, ehudula amadoda labafazi ebafaka entolongweni ⁱ.

UFiliphu utshumayela eSamariya

4 Ngakho abahlakazekileyo badabula ilizwe, betshumayela ilizwi ^j. 5 UFiliphu wasesehlela emzini weSamariya, watshumayela kubo uKristu. 6 Amaxuku aselalela nganhliziyonye okwakhulunywa nguFiliphu, esizwa njalo ebona izibonakaliso azenzayo ^k. 7 Ngoba kwabanengi ababelabomoya abangcolileyo ^l, bememeza ngelizwi elikhulu baphuma; labanengi ababome umhlubulo lababeyiziqhuli basiliswa ^m. 8 Kwaba khona intokozo enkulu kulowomuzi ⁿ.

USimoni oyisanuse

9 Njalo indoda ethile, uSimoni ngebizo, eyayikade isenza imilingo ^o emzini isanganisa isizwe saseSamariya ^p, isithi ingumuntu omkhulu ^q; 10 abayilalelayo bonke kusukela kwabancinyane kuze kube kwabakhulu ^r, besithi: Lo ungamandla amakhulu kaNkulunkulu ^s. 11 Basebemlalela ^t, ngoba wabasanganisa isikhathi eside ^u ngemilingo ^v. 12 Kodwa kwathi sebekholwe uFiliphu etshumayela indaba ezinhle zezinto ngombuso kaNkulunkulu langebizo likaJesu Kristu, babhabhathizwa bonke amadoda labafazi ^w. 13 LoSimoni laye wakholwa, njalo esebhabhathiziwe wanamathela kuFiliphu ^x; wasanganiseka, ebona imisebenzi yamandla lezibonakaliso ezazisenziwa ^y. 14 Kwathi abaphostoli abaseJerusalema bezwe ukuthi iSamariya ilemukele ilizwi likaNkulunkulu ^z, bathuma kubo uPetro loJohane ^aa; 15 abathi sebehlile babakhulekela, ukuze bamemukele uMoya oNgcwele ^{ab
,} ^ac; 16 ngoba wayengakehleli lakoyedwa wabo ^ad, kodwa babebhabhathizwe ebizweni leNkosi uJesu kuphela ^{ae
,} ^af. 17 Basebebeka izandla phezu kwabo ^ag, basebesemukela uMoya oNgcwele. ^ah 18 Njalo uSimoni esebonile ukuthi ngokubekwa kwezandla zabaphostoli uyaphiwa uMoya oyiNgcwele, waletha imali kubo ^ai, 19 esithi: Ngiphani lami lawomandla, ukuze kuthi loba ngubani engibeka izandla zami phezu kwakhe, emukele uMoya oNgcwele. 20 Kodwa uPetro wathi kuye: Isiliva sakho kanye lawe kakube sekubhubheni ^aj, ngoba ucabanga ^ak ukuthi isipho sikaNkulunkulu singazuzwa ngemali ^al. 21 Kawulasabelo lelifa ^am kuloludaba. Ngoba inhliziyo yakho kayiqondanga phambi kukaNkulunkulu ^an. 22 Ngakho phenduka kulobububi bakho, njalo ucele iNkosi, ukuthi uba kungenzeka ^ao uthethelelwe umnakano wenhliziyo yakho. 23 Ngoba ngibona ukuthi usenyongweni ebabayo ^ap njalo usekubotshweni yisono ^aq. 24 USimoni wasephendula esithi: Ngikhulekelani lina eNkosini, ukuze ngingehlelwa ngolunye lwalezizinto elizikhulumileyo ^ar. 25 Ngakho kuthe sebefakazile bekhulumile ilizwi leNkosi, babuyela eJerusalema ^as, njalo betshumayela ivangeli emizaneni eminengi yamaSamariya ^at.

Ukuphenduka kwenduna yeEthiyophiya

26 Ingilosi yeNkosi yasikhuluma ^au loFiliphu ^av, yathi: Sukuma uye eningizimu endleleni eyehla isuka eJerusalema isiya eGaza ^aw; yona iyinkangala. 27 Wasesukuma ehamba; njalo khangela umuntu weEthiyophiya ^ax umthenwa ^ay induna enkulu kaKandake indlovukazi ^az yamaEthiyophiya ^ba, eyayiphezu kwempahla yakhe eligugu yonke ^bb, eyayifikile eJerusalema ukukhonza, 28 yayisibuyela ihlezi enqoleni yayo, ibala kumprofethi uIsaya. 29 UMoya wasesithi kuFiliphu: Sondela uhambe lalinqola ^bc. 30 UFiliphu wasegijimela kuyo wayizwa ibala umprofethi uIsaya, wathi: Kambe uyaqedisisa yini lezizinto ozifundayo ^bd? 31 Yasisithi: Kambe ngingakwenelisa njani, ngaphandle kokuthi omunye angiqondise ^be? Yasimcela uFiliphu ukuthi akhwele ahlale layo ^bf. 32 Lesehlukwana sombhalo eyayisifunda yilesi: Walethwa ekuhlatshweni njengemvu; lanjengewundlu lithule phambi komgundi walo, ngokunjalo kawuvuli umlomo wakhe. 33 Ekuthotshisweni kwakhe ukwahlulelwa kwakhe kwasuswa, njalo ngubani ongalandisa ngesizukulwana sakhe? Ngoba impilo yakhe iyasuswa emhlabeni ^bg. 34 Umthenwa wasephendula uFiliphu wathi: Ngiyakubuza, umprofethi ukhuluma lokhu ngobani? Ngaye ngokwakhe, kumbe ngomunye yini? 35 UFiliphu wasevula umlomo wakhe ^bh, eseqala ^bi kulowombhalo ^bj, watshumayela uJesu kuye ^bk. 36 Kwathi besahamba endleleni, bafika emanzini athile; lomthenwa wathi: Khangela, nanka amanzi; kuyini okungivimbela ukuthi ngibhabhathizwe ^bl? 37 UFiliphu wasesithi: Uba ukholwa ngenhliziyo yonke ^bm, kuvunyelwe ^bn. Wasephendula wathi: Ngiyakholwa ukuthi uJesu Kristu ^bo uyiNdodana kaNkulunkulu ^bp. 38 Waselaya ukuthi inqola ime; basebesehlela emanzini bobabili, uFiliphu lomthenwa; wasembhabhathiza. 39 Kwathi sebekhuphukile emanzini, uMoya weNkosi wamhluthuna uFiliphu; njalo umthenwa kazabe esambona ^bq; wahamba-ke ngendlela yakhe ethokoza ^br. 40 Kodwa uFiliphu waficwa eAzotu ^bs; njalo edabula watshumayela ivangeli kuyo yonke imizi ^bt, waze wafika eKesariya ^bu.